د اي انډ د افغانستان د اس ځغلونې اتم پړاو ټورنمنټ مرکزي پلاوی د یوې ناستې په ترڅ کې وستایل شو
د المپیک، بدني رزونې او ورزش عمومي ریاست اړوند د اس ځغلونې ملي فدراسیون له لوري د اي انډ د افغانستان د اس ځغلونې اتم پړاو ټورنمنټ مرکزي پلاوی، چې له کابل څخه یې د دغو سیالیو د لا ښه ترسره کېدو په موخه ګډون کړی و، د اس ځغلونې ملي فدراسیون له لوري وستایل شو.
د ستاینې په دغه پروګرام کې د المپیک، بدني روزنې او ورزش عمومي رئیس مولوي احمدالله وثیق، د المپیکي چارو او اس ځغلونې ملي فدراسیون رئیس داد محمد پاینده اختري او په دغه ټورنمنټ کې برخه اخسیتونکو ګډون کړی و.
په پیل کې د المپیک، بدني روزنې او ورزش عمومي رئیس مولوي احمد الله وثیق ګډونواله ته ښه راغلاست ووایه او د دغو سیالیو د ښه ترسره کولو لپاره یې له ټولو ځانګړې مننه وکړه او هیله یې څرګنده کړه، چې د ورزش په هره برخه کې لا فعاله ونډه واخلي او تلپاتې همکاري وکړي.
د ستاینې دغه پروګرام په داسې وخت کې ترسره کېږي، چې یوه اوونۍ وړاندې د هرات ولایت په کوربتوب د ۱۳ ولایتونو ترمنځ د اي انډ د افغانستان د اس ځغلونې اتم پړاو ټورنمټ ترسره شو، چې په پایله کې د مختلفو ولایتونو اس ځغلونکو لومړي، دویم، درېیم او څلورم مقامونه وګټل او د هیواد په کچه ۲۰ اس ځغلونکي او ۲۰ اسونه د ملي لوبډلې لپاره وټاکل شول.
د یادونې وړ ده، چې د دغې پروګرام په پای کې په دغو سیالیو کې ګډون کوونکي پلاوي ته د المپیک، بدني روزنې او ورزش عمومي رئیس مولوي احمدالله وثیق، د المپیکي چارو او د اس ځغلونې ملي فدراسیون د رئیس داد محمد پاینده اختري له لوري ستاینلیکونه او چمتو شوې ډالۍ ورکړل شوې.
