کابل کې د څلورو لوبډلو ترمنځ د رګبي ټاکنيزې سيالۍ پيل شوې
د المپيک، بدني روزنې او ورزش عمومي ریاست اړوند د رګبي ملي فدراسیون له لوري د ياد رياست په غازي سټيډيوم کې د کابل او کاپيسا ولايتونو څخه د څلورو لوبډلو ترمنځ د کابل رګبي لوبډلې ټاکنیزې سيالۍ پيل شوې.
په دغو سياليو کې له کابل څخه آريانا، خراسان او افغان کينګ لوبډلو او د کاپيسا يوې لوبډلې ګډون کړی دی، چې په لومړۍ لوبه کې خراسان لوبډلې خپلې سیالې افغان کينګ لوبډلې ته د ۱۰/۰ نومرو په توپير ماتې ورکړه او لومړۍ بريا يې خپله کړه.
دغه سيالۍ، چې يوه ورځ به دوام وکړي، په پايله کې به يې ۱۲ ورزشکاران د کابل رګبي لوبډلې ته وټاکل شي.
د يادو سياليو موخه د کابل رګبي لوبډلې ته د غوره ورزشکارانو ټاکل دي؛ چې په پای کې به يې غوره لوبډلو او ورزشکارانو ته کپ او مډالونه ورکړل شي.
د يادونې وړ ده، چې د دغو سياليو د پيل په مراسمو کې د المپيک، بدني روزنې او ورزش عمومي رئيس مولوي احمد الله وثیق، ورزش ادارې د رهبري غړو، د رګبي ملي فدراسيون سرپرست عبدالباري ګزنګ، د ورزش ادارې مسوولینو او ورزشکارانو ګډون کړی وو.
