کابل کې د ۶۳۰ سوک وهونکو ترمنځ د سوک وهنې ټاکنیزې سيالۍ پيل شوې
د کابل ولايت د بدني روزنې او ورزش ریاست په همکارۍ د سوک وهنې ملي فدراسیون له لوري د ياد فدراسيون په جمنازيوم کې د کابل ښار له ۱۰۲ کلبونو څخه د ۶۳۰ سوک وهونکو ترمنځ د لويانو ورزشکارانو په عمري کټګورۍ کې د سوک وهنې ټاکنيزې سيالۍ پیل شوې.
دغه سيالۍ به د کابل ښار د څلورو زونونو، درېيو ولسواليو او معارف وزارت د يو کلب په ګډون به د ۶۳۰ سوک وهونکو ترمنځ له ۴۸ کيلو ګرام څخه تر +۹۲ کيلو ګرام وزني کټګوريو کې ترسره شي، چې په پايله کې به یې ۲۶ سوک وهونکي د کابل ښار د لويانو ورزشکارانو د سوک وهنې منتخبې لوبډلې ته وټاکل شي.
د يادو سياليو موخه د کابل ښار د لويانو ورزشکارانو د سوک وهنې منتخبې لوبډلې ته د غوره سوک وهونکو ټاکل دي، چې ۱۲ ورځې به دوام وکړي.
