کابل؛ د ۶۰ ورزشکارانو ترمنځ د کابل ښار د جودو ټاکنيزې سيالۍ پيل شوې
د کابل ولايت د بدني روزنې او ورزش رياست په همکارۍ او د جودو ملي فدراسيون له لوري د ورزش ادارې د جودو په ورزشي جمنازيوم کې د ۶۰ ورزشکارانو ترمنځ د ځوانانو او د لويانو ورزشکارانو په عمري کټګوريو کې د کابل ښار د جودو ټاکنيزې سيالۍ پيل شوې.
دغه سيالۍ به په درېيو وزني کټګوريو کې د کابل ښار له بېلابېلو کلبونو ورزشکارانو ترمنځ ترسره شي، چې په پايله کې به يې ۱۲ ورزشکاران د کابل ښار د جودو منتخبې لوبډلې ته وټاکل شي.
د يادو سياليو موخه د کابل ښار د جودو منتخبې لوبډلې ته د غوره ورزشکارانو ټاکل، د ورزشکارانو تخنيکي وړتيا لوړول او په کابل کې د جودو ورزش ته وده ورکول دي.
