ارزګان؛ ګیزاب ولسوالۍ کې د ۱۴ لوبډلو ترمنځ د ټېپ بال کرېکټ سیالۍ پای ته ورسېدې
د ارزګان ولایت د بدني روزنې او ورزش امریت اړوند د ټېپ بال کرېکټ فدراسیون د استازولي له لوري د یاد ولایت په ګیزاب ولسوالۍ کې د ۱۴ لوبډلو ترمنځ د ټېپ بال کرېکټ سیالۍ د مرکز اتلانو لوبډلې په اتلولي پای ته ورسېدې.
د یادو سیالیو پایلوبه د مرکز اتلانو او ازاد زلمیانو لوبډلو ترمنځ ترسره شوه. د لوبې پچه مرکز اتلانو لوبډلې وګټله او لومړی یې توپ وهنه وکړه، چې په ټاکلو ۱۴ اورونو کې یې د خپلو درېیوو لوبغاړو په له لاسه ورکولو سره خپلې سیالې لوبډلې ته د ۱۸۸ منډو هدف وټاکه.
ازاد زلمیانو لوبډلې د هدف په تعقیب کې د خپلو ټولو لوبغاړو په له لاسه ورکولو سره ۹۵ منډې وکړې او لوبه یې د ۹۲ منډو په توپیر وبایلله.
دا سیالۍ د ولسوالۍ په کچه د غوره لوبغاړو د موندلو په موخه ترسره شوې، چې شمس الله خوشحال د ۴۰۰ منډو په ترسره کولو سره د دغو لوبو غوره توپ وهونکی او زینت الله ظفري د ۲۰ ویکټو په اخیستلو سره غوره توپ اچونکی وټاکل شول.
