ایرانمېشتو افغان ورزشکارانو د بدني روزنې او ورزش له رییس سره ولیدل
دوشنبه، ۲۰مرغومي، ۱۴۰۰ل
ایرانمېشتو افغان ورزشکارانو د المپیک ملي کمېټې او د بدني روزنې او ورزش سرپرست رییس نظرمحمد مطمئن سره ولیدل او خپل وړاندیزونه او نظرونه يې شریک کړل.
ایران کې د افغان ورزشکارانو په استازولۍ موسی خدادادی له ښاغلي مطمئن مننه وکړه چې د دوی پوښتنه يې وکړه او د لومړي ځل لپاره يې د افغان ورزشي ادارې له لوري د دوی ستونزې واورېدلې.
ښاغلي مطمئن دوی ته ژمنه ورکړه چې استازی به يې رسماً تاییدېږي او هم به يې دلته ورزشي کلپونه له نظارت وروسته رسمي له افغان ورزشي ادارې سره ثبتېږي.
د دې تر څنګ به افغان ورزشکاران د مسافرو ورزشکارانو د اوسېدو اړوند لایحه برابرېوي چې باید وکتل شي او هم ضمناً د دوی د تګ راتګ په برخه کې به د بهرنیو چارو وزارت له لارې ځینې شته ستونزې حل شي.
ښاغلي مطمئن په دې سفر کې د ایران له ورزشي مسؤلینو سره هم بېلابېل ملاقاتونه لرل، چې هغوی د نورو ژمنو تر څنګه په یاد هېواد کې مېشتو افغان ورزشکارانو ته بیمه منلې او هم يې په شخصي ډول د ایران په لیګونو کې د هغوی د ګډون ژمنه وکړې ده.
