بادغیس کې د ۱۶ لوبډلو ترمنځ د فوټسال سيالۍ د ښار منتخبې لوبډلې په اتلولۍ پای ته ورسېدې
د بادغيس ولايت د بدني روزنې او ورزش امريت اړوند د فوټبال ملي فدراسیون د استازولۍ له لوري په ياد ولايت کې د ځوانانو د يووالي جام په نوم د ۱۶ لوبډلو ترمنځ د فوټسال سيالۍ، چې يوه مياشت مخکې پیل شوې وې د ښار منتخبې لوبډلې په اتلولۍ پای ته ورسېدې.
د دغو سياليو په پايلوبه کې ښار منتخبې لوبډلې خپلې سیالې متحد لوبډلې ته د ۷/۳ ګولونو په توپير ماتې ورکړه او اتلولي يې خپله کړه.
د يادو سياليو موخه د لوبغاړو ترمنځ يووالی رامنځته کول او د غوره لوبغاړو موندل و، د سياليو په پای کې غوره لوبډلې او لوبغاړو ته چمتو شوې ډالۍ ورکړل شوې.
