خوست؛ سرحد بازانو لوبډلې د سيټوان ټېپ بال کرېکټ غوره ليگ سياليو اتلولي وگټله
د خوست ولايت د بدني روزنې او ورزش آمريت په همکارۍ او د ټېپ بال کرېکټ فدراسيون د استازولۍ له لوري د ځاځي ميدان ولسوالۍ اړوند سيټوان سيمه کې د ۶ لوبډلو ترمنځ د سيټوان ټېپ بال کرېکټ غوره ليگ سيالۍ د سرحد بازانو لوبډلې په اتلولۍ پای ته ورسېدې.
د يادو سياليو پايلوبه د سرحد بازانو او دروېش تسکين لوبډلو ترمنځ ترسره شوه، د لوبې پچه سرحد بازانو لوبډلې وگټله او لومړی يې د توپ وهنې پرېکړه وکړه، چې په ټاکلو ۱۰ اورونو کې يې د ۸ لوبغاړو په سوځېدو سره خپلې سيالې لوبډلې ته د ۱۶۰ منډو هدف وټاکه، په ځواب کې دروېش تسکين لوبډلې د ټولو اورونو په لوبولو سره ۱۲۹ منډې وکړې او لوبه يې د ۲۹ منډو په توپير وبايلله.
د يادونې وړ ده، چې دغو سياليو شاوخوا يوه مياشت دوام وکړ او په پای کې د مسؤلينو لوري؛ اتلې لوبډلې ته ۲۰٫۰۰۰ زره افغانۍ او نائب قهرمان لوبډلې ته بيا ۱۰٫۰۰۰ افغانۍ د انعام په ډول ورکړل شوې.
