خوست؛ ځوان زلميو لوبډلې د ګربزو ولسوالۍ د ټېپ بال کرکټ سياليو اتلولي وگټله
د خوست ولايت د بدني روزنې او سپورټ امريت اړوند د ټېپ بال کرکټ فدراسيون د استازولۍ له لوري د گربزو ولسوالۍ په مښې کنډو سيمه کې د ۲۴ لوبډلو ترمنځ د مښې کنډو اختریز جام په نوم د ټېپ بال کرکټ سيالۍ د ځوان زلميو لوبډلې په اتلولۍ پای ته ورسېدې.
د يادو سياليو پايلوبه د ځوان زلميو او متون فيضان لوبډلو ترمنځ ترسره شوه، ځوان زلميو لوبډلې د لوبې پچې په گټلو سره په ټاکلو اتو اورونو کې د پنځو لوبغاړو په سوځېدو سره سیالې لوبډلې ته د ۱۶۱ منډو هدف کېښود، متون فيضان لوبډلې ياد هدف ترلاسه نه کړ او د څلورو منډو په توپير يې ماته ومنله.
د يادونې وړ ده، چې د دغو سياليو په پای کې اتلې لوبډلې ته مډالونه او چمتو شوې بېلابېلې ډالۍ ورکړل شوې.
