د افغانستان مرکز زون فوټبال سیالۍ د اردو اف سي لوبډلې په اتلولۍ پای ته ورسېدې
د المپيک، بدني روزنې او ورزش عمومي ریاست په همکارۍ، د کابل فوټبال فدراسيون د استازولۍ له لوري د کابل ښار په غازي سټډیوم کې د شپږو لوبډلو ترمنځ د افغانستان مرکز زون فوټبال سيالۍ، چې يوه اوونۍ مخکې پيل شوې وې د اردو اف سي لوبډلې په اتلولۍ پای ته ورسېدې.
د يادو سياليو په پايلوبه کې اردو اف سي لوبډلې خپلې سيالې کاپيسا اله سای لوبډلې ته د ۸-۱ گول په توپير ستره ماتې ورکړه او د پنځو پر له پسې برياوو او ۱۵ امتيازونو په ترلاسه کولو سره د اتلولۍ جام په خپل نوم کړ.
د دغو سیالیو د پای مراسم د المپیک، بدني روزنې او ورزش عمومي ریاست د تخنیکي او مسلکي مرستیال حافظ احمد جان ځدراڼ، د کابل فوټبال فدراسیون رئیس حاجي فرید یوسف زي، ورزشي مسؤلینو، لوبغاړو او د ورزش مينوالو په حضور کې ترسره شول.
د ويلو وړ ده، چې د سياليو په پای کې د اردو اف سي لوبډلې لوبغاړی ظریف امیني د سیالیو غوره لوبغاړی، وارث شیرزی د همدې لوبډلې څخه غوره گول وهونکی او سیف الرحمن د غوره گول ساتونکي په توگه ونومول شول.
