د فوټسال نولس کلنۍ ښکته لوبډله هېواد ته بریالۍ راستنه شوه
د مرکزي اسیا فوټسال سیالیو کې له ګډون وروسته افغان نوولس کلنۍ ښکته لوبډله نن بېرته هېواد ته راستنه شوه او دلته یې د مسوولینو او مینهوالو له خوا تود هرکلی شو.
د المپیک ملي کمېټې او ورزش ښاغلی رییس انجینر نظرمحمد مطمئن، د سلاکار بورډ غړي، د فوټبال فدراسیون رییس او ګڼو مینهوالو نن سهار په کابل هوایي ډګر ته د یادې لوبډلې د ښه راغلاست لپاره ورغلي وو او تر هغه وروسته په فوټبال فدراسیون کې د دغې اتلولۍ او لوبغاړو ستاینِغونډه وشوه.
په یادو مراسمو کې د المپیک ملي کمېټې او ورزش رییس انجینر نظرمحمد مطمئن وویل؛ د ویاړ ځای دی، چې دښمنان زموږ پر ضد تبلیغات کوي، خو زموږ ځوانان هېواد او هېوادوالو ته داسې ویاړونه راوړي.
ښاغلي مطمئن پخپلو خبرو کې د فوټبال فدراسیون له هڅو مننه وکړه او همدارنګه د لوبو کوربه هېواد څخه یې مننه وکړه، چې له افغان لوبغاړو سره یې د ویزو او نورو امکاناتو برابرولو کې مرسته وکړه.
نوموړي همدارنګه د فوټسال نوولس کلنې لوبډلې لوبغاړو له هڅو او بریاوو ستاینه وکړه او د دغه ستر ویاړ مبارکي یې لوبغاړو او ټولو هېوادوالو ته وویله.
د فوټبال فدراسیون رییس یوسف کارګر هم له حافظ احمدجان، د فوټسال رهبرۍ او ټولو لوبغاړو څخه مننه وکړه، چې د مرکزي اسیا سیالیو کې یې په لوړ همت لوبې وکړې او هېواد ته یې ستر ویاړ ور په برخه کړ.
نوموړي همدارنګه د المپیک ملي کمېټې او ورزش له مشرتابه هم مننه وکړه او دا بریا د هغوی د هڅو پایله وګڼله.
د فوټبال فني مرستیال د لوبغاړو تر منځ یووالی د ټولو بریاوو بنسټ وګاڼه او خوښي یې وښودله چې د فوټسال نوولس کلنه ملي لوبډله دا ویاړ لري او ځکه یې هېواد ته داسې ستر ویاړ راووړ.
د مراسمو په پای کې د فوټسال نوولس کلنې لوبډلې لوبغاړو ته ځانګړې شوې ډالۍ ورکړل شوې.
یاده دې وي، چې د افغانستان نوولس کلنې فوټسال لوبډلې د مرکزي اسیا سیالیو کې تر ایران وروسته دویم مقام خپل کړ. افغانستان په دغو سیالو کې ۹ نمرې ترلاسه کړې، چې قرغزستان، ازبکستان او تاجکستان ته ماتې ورکړې، خو له ایران څخه یې ماتې وخوړله. همدارنګه افغان لوبغاړی امید قنبري د دغو سیالیو غوره لوبغاړی اعلان شو.
