د يما پطرول افغانستان وزلوبې ليګ اووم پړاو پر اتمه ورځ سرپل، پنجشیر او تخار لوبډلو برياوې خپلې کړې
د هېواد المپيک، بدني روزنې او ورزش عمومي رياست په همکارۍ، د وزلوبې، نيزه وهنې او سيمه ييزو لوبو ملي فدراسیون له لوري د کابل ښار په يکه توت لوبغالي کې د ۱۱ لوبډلو ترمنځ د يما پطرول - افغانستان وزلوبې اووم پړاو ليگ سياليو پر اتمه ورځ سرپل، پنجشیر او تخار لوبډلو برياوې خپلې کړې.
د وزلوبې اووم پړاو ليگ سياليو په شلمه لوبه کې سرپل لوبډلې خپلې سيالې بغلان لوبډلې ته د شپږو امتيازونو په توپير (٩ - ٣) ماته ورکړه، په یوویشتمه لوبه کې پنجشیر لوبډلې سيالې هرات لوبډلې ته د دولس امتيازونو په توپير (١٥ - ٣) ماته ورکړه او په دوویشتمه لوبه کې تخار لوبډلې د دوه امتیازونو په توپیر (٢ - ٠) له سیالې بلخ لوبډلې څخه لوبه وګټله.
د ويلو ده، چې د يما پطرول افغانستان وزلوبې اووم پړاو ليگ د بهرنيو چاپندازانو په گډون د کندز، فارياب، بلخ، بدخشان، تخار، باميان، سرپل، پنجشير، سمنگان، بغلان او هرات لوبډلو ترمنځ اووه ورځې مخکې پيل شوی او درې ورځې به نور هم دوام وکړي.
