د پاکستان کوالیفای سیالیو کې د ګډون لپاره د اسکي لوبغاړو تیاری

چهارشنبه، ۱۵ مرغومی، ۱۴۰۰

نوید صهیب

د هېواد سکی فدارسیون د معلوماتو له مخې ددې برخې لوبغاړي په پاکستان هېواد کې د سکي کوالیفای سیالیو کې د ګډون لپاره بشپړ تیاری لري.

تمه ده یادې سیالۍ د روان ۲۰۲۲ کال د جنوري په ۱۴ نېټه په پاکستان هېواد کې ترسره شي.

په دې سیالیو کې اتو آسیایي هېوادونو ته بلنه ورکړل شوې چې له افغانستان څخه څلور لوبغاړي، یو روزونکی له یو هیأت سره پکې ګډون کوي.

د سکي فدراسیون د رئیس محمد داوود کارګر په خبره سکي فدراسیون به هېواد کې یو ژمنی او ډیر لګښت لرونکی فدراسیون دی چې اوس مهال په کور د ننه لوبو د ترسره کولو لپاره کم امکانات په لاس کې لري او نشي کولی د بدني روزنې او ورزش ریاست او المپیک ملي کمیټې له لاس نیوي او مرستې پرته د ملي ټیم سیالۍ او ټاکنې ترسره کړي؛ خو د بدني رزنې او ورزش عمومي ریاست مسۉلینو له یاد فدراسیون سره او په دوامداره توګه د دوی له ورزشي فعالیتونو څخه د فراخ ملاتړ وعده کړې.

ښاغلي کارګر زیاته کړه چې د سکي فدراسیون هر کال خپلې ملي او ولایتي لوبې د بامیانو ولایت په واورینو غرونو کې تر سره کولې چې تازه ددې ولایت ورزشي مسؤلینو د بدني روزنې او ورزش عمومي ریاست سره په همغږۍ د تیاریو خبر ورکوي.

د یادونې وړ ده چې سکي لوبغاړو ددې برخې په څلورم پړاو لوبو کې په سنوبرد سبک سره د نقرې د یو مډال او د دوهم مقام په تر لاسه کولو بریالي شوي.