قرغیزستان؛ مولوي احمدالله وثیق د روسیې د ورزش له وزیر سره ولیدل
د المپيک، بدني روزنې او ورزش عمومي رئیس مولوي احمدالله وثیق د قرغیزستان د ورزش ادارې په رسمي بلنه یاد هېواد ته د سفر په ترڅ کې د روسیې د ورزش له وزیر میخایل دیګتیاریوف سره ولیدل او د دواړو هېوادونو ترمنځ یې د ګډو ورزشي همکاریو پر اړه خبرې وکړې.
ښاغلي وثیق همداراز له ښاغلي دیګتیاریوف سره د افغانستان او روسیې ترمنځ د ورزشي اړیکو د لا پیاوړتیا، په ورزشي سیالیو کې د ورزشکارانو د ګډون او همداراز د افغانستان د ورزش د لا پرمختګ په اړه خبرې وکړې.
د یادونې وړ ده چې د المپیک، بدني روزنې او ورزش عمومي رئیس مولوي احمدالله وثیق د قرغیزستان په کوربهتوب د نومېډیک ګېم یا قبیله وي سیالیو د پرانیستې په غونډه کې د ګډون په موخه یاد هېواد ته سفر کړی دی.
دا په داسې حال کې دی، چې دغو سیالیو کې له افغانستان څخه د وزلوبې، کورش او زورخانهيي ورزشونو د برخې ورزشکارانو هم ګډون کړی دی.
د قبیله وي سیالیو شپږم پړاو د ۱۰۶ هېوادونو په ګډون د قرغیزستان په کوربهتوب په بشکیک ښار کې ترسره کېږي، چې د اګسټ پر ۳۱مه پیل شوي او د سپټمبر تر اوومې نېټې به دوام وکړي.
