لغمان؛ الينگار ولسوالۍ کې د ۲۶ لوبډلو ترمنځ د ټېپ بال کرکټ سيالۍ پای ته ورسېدې
د لغمان ولايت د بدني روزنې او ورزش امريت په همغږۍ د الينگار ولسوالۍ په شگي کلا کې د ۲۶ لوبډلو ترمنځ د ټېپ بال کرکټ سيالۍ د شگي کلا ځوانانو لوبډلې په اتلولۍ پای ته ورسېدې.
د يادو سياليو پايلوبه د شگي کلا ځوانانو او بديع الاباد لوبډلو ترمنځ ترسره شوه، شگي کلا ځوانانو لوبډلې د لوبې پچې په گټلو سره په ټاکلو لسو اورونو کې سيالې لوبډلې ته د ۱۳۵ منډو هدف کېښود، بديع الاباد لوبډلې ياد هدف ترلاسه نه کړ او د ۶۳ منډو په توپير يې ماته ومنله.
دغه سیالۍ چې يوه مياشت يې دوام وکړ، په پای کې د ياد ولايت د ورزش امريت له لوري لومړي او دويم مقام گټونکو لوبډلو ته کپونه، مډالونه او ستاينليکونه ورکړل شول.
