لغمان؛ علينگار ولسوالۍ کې د واليبال سيالۍ پای ته ورسېدې
د لغمان ولايت د بدني روزنې او ورزش آمريت اړوند د واليبال فدراسيون د استازولۍ له لوري د ياد ولايت په علينگار ولسوالۍ کې د ۳۲ لوبډلو ترمنځ د واليبال سيالۍ د ادهار لوبډلې په اتلولۍ پای ته ورسېدې.
د يادو سياليو په پايلوبه کې ادهار لوبډلې خپلې سيالې دړين لوبډلې ته د ۳-۱ ميدانونو په توپير ماتې ورکړه او اتلولي يې وگټله.
دا سيالۍ د ځوانانو لپاره د سالمې تفريح برابرولو او ورزش ته د ودې ورکولو په موخه وشوې، چې شاوخوا ۲۸ ورځې يې دوام وکړ.
