لغمان؛ نورام لوبډلې د حاجي آباد ټېپ بال کرېکټ ټورنمنټ سياليو اتلولي وگټله
د لغمان ولايت د بدني روزنې او ورزش آمريت په همغږۍ او د ټېپ بال کرېکټ فدراسيون د استازولۍ له لوري د اليشنگ ولسوالۍ په حاجي آباد کلي کې د ۴۲ لوبډلو ترمنځ د ټېپ بال کرېکټ ټورنمنټ د نورام منتخبې لوبډلې په اتلولۍ پای ته ورسېد.
د يادو سياليو پايلوبه د نورام منتخبې او ولسوالۍ مرکز لوبډلو ترمنځ وشوه، د لوبې پچه ولسوالۍ مرکز لوبډلې وگټله او لومړی يې د توپ وهنې پرېکړه وکړه، چې په ټاکلو ۹ اورونو کې يې خپلې سيالې لوبډلې ته د ۱۳۶ منډو هدف کېښود، په ځواب کې نورام منتخبې لوبډلې ياد هدف په ۹م اور کې ترلاسه کړ او لوبه يې د ۴ ويکټو په توپير وگټله.
د يادونې وړ ده، چې دغو سياليو شاوخوا ۴۵ ورځې دوام وکړ او په پای کې اتلې لوبډلې ته يو عراده موټرسايکل، دويم مقام گټونکې لوبډلې ته کپ او غوره لوبغاړو ته بېلابېلې چمتو شوې ډالۍ ورکړل شوې.
