لغمان؛ په مهترلام ښار کې د ۱۶ لوبډلو ترمنځ د ټېپ بال کرکټ سيالۍ پای ته ورسېدې
د لغمان ولايت د بدني روزنې او سپورټ امريت اړوند د ټېپ بال کرکټ فدراسيون د استازولۍ له لوري د مهترلام ښار په هرمل کلي کې د ۱۶ لوبډلو ترمنځ له اوسني نظام څخه د ملاتړ په موخه د ټېپ بال کرکټ سيالۍ د هرمل لوبډلې په اتلولۍ پای ته ورسېدې.
د يادو سياليو پايلوبه د هرمل او ابوبکر لوبډلو ترمنځ ترسره شوه، هرمل لوبډلې د لوبې پچې په گټلو سره په ټاکلو لسو اورونو کې د شپږو لوبغاړو په سوځېدو سره سیالې لوبډلې ته د ۱۷۶ منډو هدف کېښود، ابوبکر لوبډلې ياد هدف ترلاسه نه کړ او د ۹۶ منډو په توپير يې ماته ومنله.
دغه سیالۍ، چې شاوخوا ۲۱ ورځې يې دوام وکړ، په پای کې لومړي او دوهم مقام گټونکو لوبډلو ته کپونه، ستاينليکونه او مډالونه ورکړل شول.
