ميدان وردګ؛ د کرکټ ټېپ بال سيالۍ د شهيد غلام دروېش لوبډلې په ګټه پاى ته ورسېدې

د ميدان وردګ ولايت د بدني روزنې او ورزش امريت په همغږۍ د کرکټ ټېپ بال فدراسیون له لوري د دې ولایت په دايمي داد ولسوالۍ کې د شپږ لېسو د لسو لوبډلو ترمنځ د کرکټ ټېپ بال سيالۍ د شهيد غلام دروېش عالي لېسې لوبډلې په ګټه پاى ته ورسېدې.

دغو سياليو،چې پنځه ورځې يې دوام وکړ ، په پايلوبه کې يې د شهيد دروېش عالي لېسې او شهيد احمدضيا عالي لېسې لوبډلو لار وموندله، چې د شهيد غلام دروېش عالي لېسې د لوبې پچه وګټله او لومړى يې توپوهنه وکړه چې په ټاکلو اتو اورونو کې يې ٧٥منډې وکړې.

په مقابل کې د احمد ضياء عالي لېسې لوبډلې ورکړل شوى هدف پوره نه کړ او د ٧ ويکټو په زيان يې ٦٩ منډې وکړې.

په دغو سياليو کې د شهيد غلام دروېش، شهيد احمد ضياء، غازي عبدالبصير خان، سيد جمال الدین، عبدالواحد خان او شهيد بسم الله خان عالي لېسو لس لوبډلو برخه لرله، چې موخه د لېسو لوبډلو ترمنځ د همغږي او يووالي رامنځته کول دي.