ميدان وردګ؛ په چک ولسوالۍ کې د ۵۰ غشي ويشتونکو ترمنځ د غشي ويشتلو سيالۍ ترسره شوې
د ميدان وردګو ولایت بند چک ولسوالۍ د ادم خېلو کلي په کوربتوب د دوو لوبډلو د ۵۰ غشي ويشتونکو ترمنځ د غشي ويشتلو سيالۍ ترسره شوې.
په دغو سياليو کې د ادم خېلو او خواجه انګور کليو غشي ويشتونکو سيالۍ ترسره کړې، چې په پايله کې د ادم خېلو کلي غشي ويشتونکو خپلو سيالو غشي ويشتونکو ته د ۶۹-۶۳ نومرو په توپير ماتې ورکړه او په شپږو نومرو يې بريا خپله کړه.
د يادونې وړ ده، چې دغې سيالۍ يوه ورځ دوام وکړ او موخه يې د يادو کليو د ورزشکارانو ترمنځ د تجربې شريکول او د ځوانانو ترمنځ د يووالي فضا جوړول ياد شوي دي.
هېره دې نه چې دغه سيالۍ په دوديز شکل ترسره کېږي او تېره ورځ د خواجه انګور کلي غشي ويشتونکو د پيل لوبه ګټلې وه.
