میدان وردګ؛ مرکز میدان ښار کې د ۲۴ لوبډلو ترمنځ د والیبال سیالۍ پای ته ورسېدې
د میدان وردګ ولایت د بدني روزنې او ورزش آمریت اړوند د والیبال فدراسیون د استازولي له لوري د یاد ولایت مرکز میدانښار کې له اتو ولایتونو څخه د ۲۴ لوبډلو ترمنځ د والیبال سیالۍ د چارو ادارې لوبډلې په اتلولي پای ته ورسېدې.
په دغو سیالیو کې له میدان وردګ، کابل، لوګر، باميان، کنړ، لغمان، کاپيسا او غزني ولایتونو څخه ۲۴ لوبډلو ګډون کړی و، چې پای لوبه یې د چارو ادارې او میدان اتلانو لوبډلې ترمنځ ترسره شوه او په پایله کې یې د چارو ادارې لوبډلې د ۳ پر صفر میدانونو په ګټلو سره خپلې سیالې لوبډلې ته ماتې ورکړه او اتلولي یې په خپل نوم کړه.
په دغو سیالیو کې د چارو ادارې لوبډلې لومړی، میدان اتلانو دویم او شمس مایار لوبډلې بیا درېیم مقام ترلاسه کړ.
یادې سیالۍ ورزش ته د ځوانانو د هڅولو په موخه ترسره شوې، چې یوه اوونۍ یې دوام وکړ او په پای کې لومړي مقام ګټونکې لوبډلې ته ۲۰ زره افغانۍ، دویم مقام ته لس زره افغانۍ او درېیم مقام ته شپږ زره افغانۍ د ډالۍ په توګه ورکړل شوې.
