ننګرهار؛ مرکز جلال اباد ښار کې د ۴۰ ورزشکارانو ترمنځ د سوک وهنې سیالۍ ترسره شوې
د ننګرهار ولایت د بدني روزنې او ورزش ریاست اړوند د سوک وهنې فدراسیون د استازولۍ له لوري د یاد ولایت مرکز جلال آباد ښار کې له درېیوو کلبونو د ۴۰ ورزشکارانو ترمنځ د سوک وهنې سیالۍ ترسره شوې.
په دغو سیالیو کې د خراسان، افغان مبارز او مظلوم یار کلبونو ورزشکارانو ګډون کړی و، چې په پایله کې افغان مبارز کلب په لسو بریاوو سره لومړی، خراسان کلب په اوو بریاوو دویم او مظلوم یار کلب په دریوو بریاوو سره درېیم مقام خپل کړ.
دا سیالۍ د ورزشکارانو ترمنځ د ټاکنیزو سیالیو ته د چمتو والي په موخه ترسره شوې، چې یوه ورځ یې دوام وکړ او په پای کې غوره ورزشکارانو ته مډالونه او ستاینلیکونه ورکړل شول.
