ننګرهار؛ په شیرزادو ولسوالۍ کې د ۱۰ لوبډلو ترمنځ د ټېپ بال کرېکټ سیالۍ پای ته ورسیدې
د ننګرهار ولایت د بدني روزنې او ورزش رياست له لوري د ياد ولايت په شيرزادو ولسوالۍ کې د ۱۰ لوبډلو ترمنځ د سولې جام په نوم د ټېپ بال کرېکټ سيالۍ د کودخيل شاهانو لوبډلې په اتلولۍ پای ته ورسېدې.
د دغو سياليو پايلوبه د حاجي عتیق او کودخيل شاهانو لوبډلو ترمنځ ترسره شوه، حاجي عتیق لوبډلې د پچې په ګټلو سره د توپ وهنې پرېکړه وکړه، چې په ټاکلو ۱۰ اورونو کې د شپږو لوبغاړو په سوځېدو سره مقابلې لوبډلې ته د ۱۴۱ منډو هدف وټاکه. په ځواب کې د کودخيل شاهانو لوبډلې ټاکل شوی هدف د لوبې په ورستي اور کې د ۸ لوبغاړو په سوځېدو سره پور کړ او اتلولي يې د دوو ويکټو په توپير سره وګټله.
د يادو سياليو موخه ورزش ته د ځوانانو هڅولول و، چې دوې اوونۍ دوام وکړ.
