ننګرهار؛ په کامې ولسوالۍ کې د والیبال سیالیو اتلولي عبدالرحیمزي لوبډلې وګټله
د ننګرهار ولایت په کامې ولسوالۍ کې چې د لومړي ځل لپاره د اته لوبډلو ترمنځ د والیبال سیالۍ پیل شوې وې د عبدالرحیمزي لوبډلې په بریا پای ته ورسېدې.
د دې سیالیو پایلوبه د «غلام دستګیرعبدالرحیمزي او ګوشته والو» لوبډلو ترمنځ ترسره شوه، چې د « ۲ – ۰» میدانونو په توپیر د غلام دستګیر عبدالرحیمزي لوبډلې په اتلولۍ او ګوشته والو لوبډلې په دویم مقام پای ته ورسېدې.
په یاده لوبه کې د کامې ولسوال مولوي محمد اجمل شګیوال، امنیه قومندان قاري صلاح الدین، د امنیت آمر رفیع الله شاهین، د امربالمعروف مدیرمولوي حکمت الله، د ورزش آمر منیرالدین خالد ، د ننګرهار د بدني روزنې او ورزش رئیس عبدالسلام "وزیروال" ، مخورو، ځوانانو او د ورزش ګڼ شمېر مینوالو ګډون کړی و.
د یادو سیالیو موخه کامې ولسوالۍ کې د ورزش وده، د ځوانانو یووالی او هڅونه وه، چې ۲۰ ورځې یې دوام وکړ.
په پای کې د مسوولینو له خوا ګټونکې لوبډلې ته کپ او غوره لوبغاړو ته مډالونه او نورې ډالۍ ورکړل شوې.
