ننگرهار؛ په جلال اباد ښار کې د ۱۵ لوبډلو ترمنځ د ټېپ بال کرکټ سيالۍ پای ته ورسېدې
د ننگرهار ولايت د بدني روزنې او سپورټ رياست په همکارۍ د جلال اباد ښار په لومړۍ ناحیه کې د ۱۵ لوبډلو ترمنځ له اوسني نظام څخه ملاتړ په موخه د ټېپ بال کرکټ سيالۍ، چې يوه مياشت مخکې پيل شوې وې، د چپرهار زلميو لوبډلې په اتلولۍ پای ته ورسېدې.
د يادو سياليو پايلوبه د چپرهار زلميو او خوشکمبت اتلانو لوبډلو ترمنځ ترسره شوه، چپرهار زلميو لوبډلې د لوبې پچې په گټلو سره په ټاکلو لسو اورونو کې د پنځو لوبغاړو په سوځېدو سره سیالې لوبډلې ته د ۱۵۵ منډو هدف وټاکه، په مقابل کې خوشکمبت اتلانو لوبډلې ۱۳۵ منډې وکړې او لوبه يې د ۲۰ منډو په توپير وبايلله.
ياده دې وي، چې د دغو سياليو په پای کې اتلې لوبډلې ته د اتلولۍ جام ورکړل شو.
