ننگرهار؛ په شينوارو ولسوالۍ کې د ۲۴ ښوونځيو ترمنځ د ټېپ بال کرېکټ سيالۍ پای ته ورسېدې
د ننگرهار ولایت د بدني روزنې او ورزش رياست اړوند د شينوارو شپږگونو ولسواليو ورزشي مدیریت له لوري د شينوارو ولسوالۍ په شيتکو لوبغالي کې د ۲۴ ښوونځيو ترمنځ د تعليمي چاپيريال ساتنې او د علم پرمختگ په موخه د ټېپ بال کرېکټ سيالۍ د کهي عالي لېسې لوبډلې په اتلولۍ پای ته ورسېدې.
د يادو سياليو پايلوبه د کهي او الفتح عالي لېسو لوبډلو ترمنځ ترسره شوه، چې الفتح عالي لېسې لوبډلې د لوبې پچې په گټلو سره په ټاکلو لسو اورونو کې د اوو لوبغاړو په سوځېدو سيالې لوبډلې ته د ۸۹ منډو هدف وټاکه، په مقابل کې کهي عالي لېسې لوبډلې ياد هدف د لوبې په اتم اور کې ترلاسه کړ او د درېيو ویکټو په توپیر يې بريا خپله کړه.
د ويلو ده، چې دغو سياليو شاوخوا يوه مياشت دوام وکړ.
