هلمند؛ ناوې ستورو لوبډلې د اختریز جام په نوم د ټېپ بال کرکټ سياليو اتلولي وگټله
د هلمند ولايت د بدني روزنې او ورزش امريت په همغږۍ د ناوې ولسوالۍ په مرکزي ميدان کې د ۲۴ لوبډلو ترمنځ د اختريز جام په نوم د ټېپ بال کرکټ سيالۍ د ناوې ستورو لوبډلې په اتلولۍ پای ته ورسېدې.
د يادو سياليو پايلوبه د ناوې ستورو او پښتون سادات لوبډلو ترمنځ ترسره شوه، ناوې ستورو لوبډلې د لوبې پچې په گټلو سره په ټاکلو لسو اورونو کې سيالې لوبډلې ته د ۱۹۸ منډو هدف کېښود، پښتون سادات لوبډلې ياد هدف ترلاسه نه کړ او د ۱۸ منډو په توپير يې ماته ومنله.
د دغو سياليو د ترسره کېدو موخه ورزش ته د ځوانانو هڅول وو، چې شاوخوا دوې اوونۍ يې دوام وکړ او په پای کې لومړي مقام گټونکې لوبډلې ته يو عراده موټر سايکل، دويم مقام گټونکې لوبډلې ته يو عراده بايسکل او غوره لوبغاړو ته چمتو شوې ډالۍ ورکړل شوې.
