هلمند؛ ځوانانو لوبډلې د "رڼا گروپ" فوټبال سياليو اتلولي وگټله
د هلمند د بدني روزنې او سپورټ آمريت له خوا او د فوټبال فدراسيون د نماينده ګۍ په لارښوونې او همکارۍ د رڼا گروپ په نوم د فوټبال سيالۍ، چې د ۱۱ لوبډلو ترمنځ يوه مياشت مخکې د گرشک ولسوالۍ په ابوالفتح بوستي عالي لېسې کې پېل شوې وې، تېره ورځ پای ته ورسېدې.
د يادو سياليو پايلوبه د ځوانانو او شمشاد فوټبال لوبډلو تر منځ تر سره شوه، چې پۀ ټاکلو شويو قانوني دقیقو کې سيالي ۱/۱ مساوي شوه، چې سيالۍ دويم پړاو ته ولاړه، په پنالټيانو کې ځوانانو لوبډلې ۳/۱ گلونو په توپير سره شمشاد لوبډلې ته په ماتې ورکولو سره د یاد سیالیو اتلولي خپله کړه.
د سياليو غوره گول وهونکی او لوبغاړی میرویس وټاکل شو، چې نوموړي په ياد جام کې څلور گلونه ووهل، د دې تر څنگ غوره گول ساتونکی محمد مسعود ياد شو.
د سيالۍ پایلوبې ته، د يادې ولسوالۍ دولتي مسؤلين، قومي مشران او گڼ شمېر ځوانان راغلي وو، چې په پای کې غوره لوبغاړو ته فردي جوايز ورکړل شول.
