هلمند؛ ګرمسېر ولسوالۍ کې د ۲۰ لوبډلو ترمنځ د ټېپ بال کرېکټ سیالۍ پای ته ورسېدې
د هلمند ولایت د بدني روزنې او ورزش آمریت اړوند د ټېپ بال کرېکټ فدراسیون د استازولۍ له لوري د ياد ولايت په ګرمسېر ولسوالۍ کې د ۲۰ لوبډلو ترمنځ د ټېپ بال کرېکټ سیالۍ د هزار جفت مرکزي لوبډلې په اتلولي پای ته ورسېدې.
د یادو سیالیو پایلوبه اتحاد هزار جفت او هزار جفت مرکزي لوبډلو ترمنځ ترسره شوه. د لوبې پچه هزار جفت مرکزي لوبډلې وګټله او لومړی یې توپ وهنه وکړه، چې په ټاکلو ۱۲ اورونو کې یې د دوو ویکټو په زیان خپلې سیالې لوبډلې ته د ۲۴۴ منډو هدف وټاکه. اتحاد هزار جفت لوبډلې د هدف په تعقیب کې د ټولو ویکټو په زیان ١۰۰ منډې وکړې او د ۱۴۳ منډو په توپیر یې لوبه وبایلله.
دا سیالۍ د ځوانانو ترمنځ د یووالي په موخه ترسره شوې، چې درې اوونۍ یې دوام وکړ او په پای کې اتلې لوبډلې ته یو عراده بایسکل د ډالۍ په توګه ورکړل شو.
