پنجشېر؛ د "اخوت جام" په نوم د اتو لوبډلو ترمنځ د فوټبال سيالۍ پيل شوې
د پنجشېر ولایت په کوربتوب د "اخوت جام" په نوم د ٨ولايتونو ترمنځ د فوټبال سيالۍ رسما پیل شوې.
د دغو سياليو د پيل په مراسمو کې د المپيک ملي کمېټې او سپورټ عمومي رئيس الحاج مولوي عبدالودود حقاني، د بدني روزنې او ورزش عمومي ریاست فني او مسلکي مرستيال حافظ احمد جان ځدراڼ، د المپيک ملي کمېټې اجرائیه رئیس داد محمد پاينده اختري، د فوټبال فدراسیون رئیس محمد يوسف کارګر، رئیسانو، مشاورینو، د مشورتي بورډ غړو، د يو شمېر فدراسيونونو رئيسانو، د پنجشېر ولايت حکومتي چارواکو، د ورزش ولايتي مسوولینو، ورزشکارانو او د فوټبال مينوالو شتون درلود.
د دغو سياليو په پيل کې د فوټبال ملي فدراسیون رئیس محمد يوسف کارګر خبرې وکړې نوموړي وويل: ورزش او ورزشکار د ملت د ارادې تمثيلونکي دي، چې ملي او بين المللي ميدانونو کې د هېواد اراده تمثيلوي.
ښاغلي کارګر زياته کړه دا د وياړ ځاى دى، چې له دوه ويشت کلونو وروسته په لومړي ځل د ليرې پرتو ولايتونو ورزشکاران په پنجشېر کې د فوټبال لوبه کوي.
نوموړي فوټبال او په ټوله کې ورزش د ورورۍ ښوونکى وباله په خبره يې ورزش سياست نه دى او دوى به ورزش سياسي نه کړي.
ورپسې د المپيک ملي کمېټې او سپورټ عمومي رئيس الحاج مولوي عبدالودود حقاني خبرې وکړې نوموړي وويل: خوښ يم چې نن د پنجشېر د ولس په نوښت د اخوت جام د فوټبال سيالۍ ترسره کيږي.
ښاغلي حقاني ورزش او ورزشکاران له سياست څخه ليرې وبلل په خبره يې؛ ورزش د ولسونو، ولايتونو، ولسواليو، کليو او ان د نړۍ ترمنځ د ارتباط پُل دى.
نوموړي په خپلو خبرو کې وويل؛ دا د وياړ ځاى دى چې د ليرې پرتو ولايتونو ورزشکاران له دوو لسيزو وروسته پنجشېر ته راځي او دلته د فوټبال لوبې کوي، چې دا د هغو خلکو او کړيو پر مخ درنه څپېړه ده، چې د
پنجشېر ولایت نړۍ ته ناامنه ښيي.
ښاغلي حقاني د پنجشېر خلکو ته ډاډ ورکړ، چې د ورزش اداره به په دې ولايت کې د ټولو ورزشي رشتو د لوبو زمينه برابروي او دلته به ورزش ته وده ورکوي.
د يادو سياليو پر مهال د ورزشکار جاويد افغان له لوري جالب ورزشي نمايشونه هم ترسره شول.
د فوټبال د دغو سياليو د پيل په لوبه کې اتحاد پنجشېر او صرافان هرات لوبډلې سره مخ شوې، چې صرافان هرات لوبډلې د ٢-٠ ګولونو په توپیر د اتحاد پنجشېر لوبډلې ته ماتې ورکړه.
همداراز په دويمه لوبه کې بيا د متحد افغان کابل او بريال خوست لوبډلې سره ولوبېدلې، چې د دې دواړو لوبډلو لوبه ٣-٢ بريال خوست لوبډلې وګټله.
دغه سيالۍ چې اته ورځې به دوام وکړي پکې د متحد افغان کابل، صرافان هرات، جوانان اميد غزنه، خانزاده کندهار، اتحاد پنجشېر، اتحاد پروان، بريال خوست او اتفاق بلخ لوبډلې ګډون لري.
