په خوست کې د څلورو لوبډلو ترمنځ د فوټبال سيالۍ پيل شوې
د خوست ولايت د مرکز لکڼو ځوانانو له لوري د کندهار، پکتیا او خوست ولایت د څلورو لوبډلو ترمنځ د فوټبال اختریز جام سیالۍ پیل شوې.
د اختریز جام په دغو سیالیو کې د کندهار فوټبال کلب، پکتیا اتفاق، خوست نبي او خوست لکڼ سنګر رئیس لوبډلې ګډون لري او لوبېږي.
په همدې موخه په جوړو شوو مراسمو کې د افغانستان د بدني روزنې او فوټبال فدراسیون فني او مسلکي معاون حافظ احمد جان ځدران، د خوست ولايت ورزشي مسوولينو، قومي مشرانو، ورزشکارانو او د ورزش مينوالو ګډون کړی و.
د دغو سياليو د پیل لوبه د کندهار کلب او خوست نبي لوبډلو ترمنځ ترسره شوه، چې په پايله کې خوست نبي لوبډلې خپلې سيالې لوبډلې ته د ۴/۱ ګولونو په توپير ماتې ورکړه او بريا يې خپله کړه.
هېره دې نه وي، چې دغه سيالۍ به درې ورځې دوام وکړي او د لوبې په لومړيو مراسمو کې د کمېټې له مسوولينو سره، د هيواد د ورزش ادارې د فني او مسلکي معاون حافظ احمد جان ځدران له لوري ۱۰۰۰۰ لس زره افغانۍ همکاري هم وشوه.
