په پکتیا کې د ۵۱ ورزشکارانو ترمنځ د ځغاستې سیالۍ وشوې
د پکتیا ولایت د بدني روزنې او ورزش ریاست اړوند د مختلفو ورزشي رشتو د "۵۱" ورزشکارانو ترمنځ د ګردېز له مرکزي چوک څخه د پکتیا ولایت تر مقام پورې، چې شپږ کيلو متره واټن کېږي د ځغاستې سيالۍ وشوې.
دغه سيالۍ د ( یو بل منلو) په نوم د ياد ولايت د بدني روزنې او ورزش رياست له لوري د افغان بیسم مخابراتي شبکې په مالي ملاتړ ترسره شوې او یوه ورځ یې دوام وکړ.
د دغو سیاليو د پای په مراسمو کې د پکتیا ولايت مرستیال والي شیخ انعام الله "صلاح الدین"، د ياد ولايت د ورزش رييس قاري نورالرحمن "تسکین"، د افغان بیسم مخابراتي شبکې سیمه ييز استازي، قومي مشرانو، استادانو او ګڼ شمېر ورزشکارانو ګډون درلود.
هېره دې نه وي، چې يادې سیالۍ د ځوانانو په کټګورۍ کې ترسره شوې، چې په ترتیب سره محیب الله، محمد نبي او ممتاز ملنګیار لومړۍ، دوهم او دریم مقامونه ترلاسه کړل او په پای کې غوره ورزشکارانو ته چمتو شوې ډالۍ ورکړل شوې.
