پکتيا؛ په مرکز گردېز ښار کې د ۳۰ ورزشکارانو ترمنځ د پاور لفټينگ سيالۍ ترسره شوې

د پکتيا ولايت د بدني روزنې او سپورټ رياست اړوند د پاور لفټينگ فدراسيون د استازولۍ له لوري د ياد ولايت په مرکز گردېز ښار کې د ۳۰ ورزشکارانو ترمنځ په درېيو عمري کټگوريو کې د پاور لفټينگ دوستانه سيالۍ ترسره شوې.

دغه سیالۍ چې يوه ورځ يې دوام وکړ، په پايله کې په نويو ځوانانو کټگورۍ کې سميع الله، عبدالمجید، فيض، په ځوانانو کې سعيد الله، فریدالله، عبرت الله او په لويانو کټگورۍ کې عمرگل، محمد الله او صادق بيا په ترتیب سره لومړي، دويم او درېيم مقامونه ترلاسه کړل.

د يادو سياليو د ترسره کېدو موخه راتلونکو سياليو لپاره د ورزشکارانو ښه تياری و، چې په پای کې غوره ورزشکارانو ته چمتو شوې ډالۍ ورکړل شوې.