پکتیا کې د ۳۵ ورزشکارانو ترمنځ د جمناستیک سیالۍ وشوې
د پکتیا ولایت د بدني روزنې او ورزش ریاست په همکارۍ، د جمناستیک فدراسیون د استازولۍ له لوري د مرکز گردېز ښار په منور کلب کې د ۳۵ ورزشکارانو ترمنځ د جمناستیک دوستانه سیالۍ وشوې.
دا سیالۍ د نویو ځوانانو او لویانو ورزشکارانو په عمري کټګوریو کې ترسره شوې، چې په پایله کې د نویو ځوانانو له ډلې څخه صدام لومړی، نعمت الله دویم، سیف الله درېیم او لویانو کې بيا عصمت الله لومړی، نعمت الله دویم او محمد الله درېیم مقامونه ترلاسه کړل.
د يادو سياليو موخه د غوره لوبغاړو موندل او جمناستیک ورزش ته د وده ورکول وو، چې يوه ورځ يې دوام وکړ.
