پکتیکا؛ برمل ولسوالۍ کې د لسو لوبډلو ترمنځ د ټېپ بال کرېکټ سيالۍ پای ته ورسېدې
د پکتيکا ولايت د بدني روزنې او ورزش امريت اړوند د ټېپ بال کرېکټ فدراسيون د استازولۍ له لوري او AWEC مؤسسې په مالي ملاټر د یاد ولايت په برمل ولسوالۍ کې د لسو لوبډلو ترمنځ د ټېپ بال کرېکټ سيالۍ، چې دوې اوونۍ مخکې پيل شوې وې د وزیرستان زلمو لوبډلې په اتلولۍ پای ته ورسېدې.
د يادو سياليو پايلوبه د وزيرستان زلمو او بانډوري ساتونکو لوبډلو ترمنځ ترسره شوه، بانډوري ساتونکو لوبډلې د لوبې پچه وگټله او لومړی يې د توپ وهنې پرېکړه وکړه، چې په ټاکلو اتو اورونو کې د پنځو لوبغاړو په سوځېدو سره سيالې لوبډلې ته ۶۰ منډو هدف وټاکه، په مقابل کې وزيرستان زلمو لوبډلې ياد هدف د لوبې په پنځم اور کې ترلاسه کړ او د اتو ویکټو په توپير يې بريا خپله کړه.
د يادولو وړ ده، چې د دغو سياليو موخه په ليرې پرتو سيمو کې ورزش ته وده ورکول و.
