پکتیکا؛ خوشامند ولسوالۍ کې د ۲۸ لوبډلو ترمنځ د والیبال سیالۍ د مامورخېلو الف لوبډلې په اتلولي پای ته ورسېدې
د پکتیکا ولایت د بدني روزنې او ورزش آمریت په همغږي او د والیبال فدراسیون د استازولي له لوري د یاد ولایت په خوشامند ولسوالۍ کې د ۲۸ لوبډلو ترمنځ د والیبال اختریزې سیالۍ د مامورخېلو الف لوبډلې په اتلولي پای ته ورسېدې.
د یادو سیالیو پایلوبه د مامورخېلو الف او مامورخېلو ب لوبډلو ترمنځ ترسره شوه، چې په پایله کې یې مامورخېلو الف لوبډلې د ۲/صفر میدانونو په توپیر خپلې سیالې لوبډلې ته ماتې ورکړه او اتلولي یې په خپل نوم کړه.
دغه سیالۍ د اختر په ورځو کې د سیمې د ځوانانو لپاره د سالمې تفرېح برابرولو او په ليرې پرتو سیمو کې ورزش ته د ودې ورکولو په موخه ترسره شوې، چې یوه اوونۍ یې دوام وکړ او په پای کې اتلې لوبډلې ته د اتلولي کپ او غوره لوبغاړو ته نورې چمتو شوې ډالۍ ورکړل شوې.
