پکتیکا؛ سروبي ولسوالۍ کې د ۲۰ لوبډلو ترمنځ د ټیپ بال کرېکټسیالۍ پای ته ورسېدې
د پکتیکا ولایت د بدني روزنې او ورزش امریت اړوند د ټیپ بال کرېکټ فدراسیون د استازولۍ له لوري د یاد ولایت په سروبي ولسوالۍ کې د ۲۰ لوبډلو ترمنځ د ټیپ سیالۍ د ماسټر ګوهر لوبډلې په اتلولي پای ته ورسېدې.
د یادو سیالیو پایلوبه د سید محمد او ماسټر ګوهر لوبډلو ترمنځ ترسره شوه. د لوبې پچه سید محمد لوبډلې وګټله او لومړی یې توپ وهنه وکړه، چې په ټاکلو لسو اورونو کې یې د اوو ویکټو په زیان خپلې سیالې لوبډلې ته د ۱۴۱ منډو هدف وټاکه. ماسټر ګوهر لوبډلې ټاکلی هدف د پنځو ویکټو په زیان د لوبې په وروستي اور کې ترلاسه کړ او د پنځو ویکټو په توپیر یې د دغو سیالیو اتلولي وګټله.
دا سیالۍ د ځوانانو ترمنځ د یووالي په موخه ترسره شوې، چې ۱۵ ورځې یې دوام وکړ او په پای کې اتلې لوبډلې ته یو عراده موټرسایکل د ډالۍ په توګه ورکړل شو.
