پکتیکا؛ سروبي ولسوالۍ کې د ۲۴ لوبډلو ترمنځ د والیبال سیالۍ پای ته ورسېدې
د پکتیکا ولایت د بدني روزنې او ورزش آمریت اړوند د والیبال فدراسیون د استازولي له لوري د یاد ولایت په سروبي ولسوالۍ کې د ۲۴ لوبډلو ترمنځ د والیبال سیالۍ د یارانو لوبډلې په اتلولي پای ته ورسېدې.
د یادو سیالیو په پایلوبه کې یارانو لوبډلې د ۳ پر یو میدان په توپیر خپلې سیالې ګردېز نیازي لوبډلې ته ماتې ورکړه او اتلولي یې وګټله.
دا سیالۍ د ځوانانو ترمنځ د یووالي په موخه ترسره شوې، چې ۳۰ ورځې یې دوام وکړ او په پای کې اتلې لوبډلې ته یو موټر د ډالۍ په توګه ورکړل شو.
