پکتیکا؛ مرکز ښرنه کې د ۲۴ لوبډلو ترمنځ د والیبال سيالۍ پای ته ورسېدې
د پکتیکا ولایت د بدني روزنې او ورزش آمریت اړوند د والیبال فدراسیون د استازولي له لوري د یاد ولایت مرکز ښرنې څلي سیمه کې د ۲۴ لوبډلو ترمنځ د والیبال سیالۍ د نوروز ځواک لوبډلې په اتلولي پای ته ورسېدې.
په دغو سیالیو کې د مرکز ښرنې سربېره د غزني ولایت لوبډلو هم ګډون کړی و، چې پایلوبه یې د نوروز ځواک او منهاج لوبډلو ترمنځ ترسره شوه، چې په پایله کې یې نوروز ځواک لوبډلې د ۳ پر یو میدانونو په توپیر خپلې سیالې لوبډلې ته ماتې ورکړه او اتلولي یې په خپل نوم کړه.
دا سیالۍ د ځوانانو ترمنځ د یووالۍ د رامنځته کولو په موخه ترسره شوې، چې ۱۲ ورځې یې دوام وکړ.
