پکتیکا؛ په برمل ولسوالۍ کې د ۱۰ لوبډلو ترمنځ د ټېپ بال کرېکټ سيالۍ پيل شوې
پکتیکا ولایت د بدني روزنې او ورزش امريت اړوند د ټېپ بال کرېکټ فدراسیون د استازولۍ او د (AWEC) موسسې په مالي ملاتړ د ياد ولايت په برمل ولسوالۍ کې د ۱۰ لوبډلو ترمنځ د ټېپ بال کرېکټ سيالۍ د فهيم لوبډلې په بريا سره پيل شوې.
د دغو سياليو لومړۍ لوبه د احمد فهیم او قدرت الله لوبډلو ترمنځ ترسره شوه، قدرت الله لوبډلې د پچې په ګټلو سره د توپ وهنې پرېکړه وکړه، چې په ټاکلو اوو اورونو کې یې د پنځو لوبغاړو په سوځېدو سره مقابلې لوبډلې ته د ۷۰ منډو هدف وټاکه. په ځواب کې د احمد فهیم لوبډلې ټاکل شوی هدف د لوبې په اووم اور کې د دوو لوبغاړو په سوځېدو سره پور کړ او لوبه يې د اتو ویکټو په توپیر وګټله.
د يادو سياليو موخه په لري پرتو سيمو کې ورزش ته وده ورکول دي، چې ۱۲ ورځې به دوام وکړي.
