کابل؛ د تکواندو ۱۶ کسیزه ملي لوبډله د تکواندو آزادو سیالیو کې د ګډون په موخه قزاقستان ته ولاړه
د المپیک، بدني روزنې او ورزش عمومي ریاست اړوند د تکواندو ملي فدراسیون ۱۶ کسیزه ملي لوبډله د دغې رشتې په نړۍوالو آزادو سیالیو کې د ګډون په موخه قزاقستان ته لاړه.
په دغه ۱۶ کسیز ترکیب کې شپږ تنه د تنکیو ځوانانو او اته تنه د لویانو په عمري کټګوریو کې ورزشکارانو او دوه تنه روزونکي شامل دي.
دغو لوبغاړو له سفر مخکې د هېواد د ورزش ادرې له عمومي رئیس مولوي احمدالله وثیق سره ولیدل. ښاغلي وثیق دغو ورزشکارانو ته د لوبو او سفر اړوند لازمې لارښوونې وکړې او په سیالیو کې یې ورته د بریا دعا وکړه.
ټاکل شوې، چې د تکواندو نړۍوالو آزادو سیالیو کې به د لویانو ورزشکارانو سیالۍ د روانې اګشت میاشتې په ۱۴مه او د تنکیو ځوانانو سیالۍ به د همدې میاشتې په ۱۵مه نېټه ترسره شي.
