کابل؛ د سولې او دوستۍ په نوم د قوت الرمي پنځم پړاو سيالۍ پيل شوې
په پلازمېنه کابل کې د بدني روزنې او ورزش عمومي ریاست په ٥٠٠ کسيز ورزشي جمنازيوم کې د "سولې او دوستۍ" په نوم د قوت الرمي پنځم پړاو سيالۍ پيل شوې.
د دغو سياليو د پيل په مراسمو کې د المپيک ملي کمېټې او سپورټ عمومي رئيس مولوي احمد الله وثيق، د بدني روزنې او ورزش عمومي ریاست فني او مسلکي مرستيال حافظ احمد جان، د دعوت ارشاد رئیس مولوي داد محمد بريال عطايي، د ورزش ادارې نورو مسوولینو، د فدراسيونونو استازو او ورزشکارانو ګډون درلود.
په پيل کې د قوت الرمي فدراسیون رئیس علي شاه محمدي د دې فدراسیون د کورنيو او بهرنيو لاسته راوړنو په اړه معلومات ورکړل.
ښاغلي محمدي د ورزش ادارې له رهبري د قوت الرمي فدراسیون لپاره د يو پايه رينګ غوښتنه وکړه تر څو له کرايي رينګونو څخه استفاده ونه کړي .
ورپسې د بدني روزنې او ورزش عمومي ریاست فني او مسلکي مرستيال حافظ احمد جان ځدراڼ خبرې وکړې نوموړي وويل؛ د افغانستان ا.ا په راتګ سره په هېواد کې ورزش د پام وړ پرمختګ کړى.
ښاغلي ځدراڼ د قوت الرمي روانو سياليو ته په اشارې وویل؛ د ولايتونو ترمنځ سيالۍ به د ورزشکارانو ظرفيت نور هم لوړ کړي، چې په دې سره په کور دننه او بهر سياليو ته ښه چمتو شي.
نوموړي ډاډ ورکړ چې په وخت به د ټولو فدراسيونونو ستونزو ته رسيدنه کوي.
ځدراڼ د قوت الرمي فدراسیون ته د يوه پايه رينګ د ورکړي ژمنه هم وکړه.
د قوت الرمي په دغو سياليو کې د کابل، غزني، کاپيسا او ميدان وردګو ولايتونو ١٢٠ ورزشکاران برخه لري.
يادې سیالۍ چې دوه ورځې به دوام وکړي موخه يې د ورزشکارانو ظرفيت لوړول، د ولايتونو ورزشکارانو ترمنځ د ښو اړيکو رامنځته کول او د تجربو شريکول دي.
