کابل؛ چهار اسياب ولسوالۍ کې د ۲۶ لوبډلو ترمنځ د فوټبال سيالۍ پای ته ورسېدې
د المپيک کمېټې، بدني روزنې او ورزش عمومي رياست اړوند د فوټبال ملي فدراسيون له لوري د کابل ولايت په چهار اسياب ولسوالۍ کې د ۲۶ لوبډلو ترمنځ د فوټبال حذفي سيالۍ د چهار اسياب ستورو لوبډلې په اتلولۍ پای ته ورسېدې.
د دغو سياليو په پايلوبه کې د چهار اسياب ستورو لوبډلې خپلې سیالې بګرامي فواد لوبډلې ته د ۲/۱ ګولونو په توپير ماتې ورکړه او اتلولي يې خپله کړه.
په دغو سياليو کې مبين نيازی غوره لوبغاړی، عثمان افغان غوره ګول وهونکی او فواد سلېمان خېل غوره ګول ساتونکی وپېژندل شو.
د يادو سياليو موخه د ځوانانو ترمنځ يووالی رامنځته کول و، چې دوې مياشتې يې دوام وکړ.
د سياليو په پای کې غوره لوبډلې ته يو پسه او د اتلولۍ جام او غوره لوبغاړو ته ورزشي ډالۍ ورکړل شوې.
