کابل ښار کې د ۵۰ ورزشکارانو ترمنځ د پومسه سبک لومړی پړاو او د مبارزه سبک څوارلسم پړاو تکواندو سیالۍ پیل شوې
د هېواد د المپیک، د بدني روزنې او ورزش عمومي ریاست اړوند د تکواندو ملي فدراسیون له لوري په کابل ښار کې د تکواندو مبارزه سبک څوارلسم پړاو ازادې سیالۍ د ماشومانو او تنکیو ځوانانو په عمري کټګوریو او د پومسه سبک لومړی پړاو سیالۍ پیل شوې.
په دغو سیالیو کې د کابل ښار ۵۰ ورزشکارانو په لسو لوبډلو او بېلا بېلو وزني کټګوریو کې ګډون کړی دی، چې په پایله کې به غوره لوبډلې او ورزشکاران وستایل شي.
د یادو سیالیو موخه د ماشومانو او تنکیو ځوانانو ورزشکارانو ترمنځ د تکواندو ورزش ته وده ورکول او د روژې میاشتې نمانځل دي، چې دوې ورځې به دوام وکړي.
