کابل کې د ويلچر هنډبال معلولو ورزشکارانو ته د پوهاوي درې ورځنی سمينار پيل شو
د المپيک، بدني روزنې او ورزش عمومي رياست اړوند د هنډبال ملي فدراسيون له لوري د کابل ولايت څخه د پارا هنډبال ۲۰ ورزشکارانو ته د ويلچر هنډبال د پوهاوي درې ورځنی سمينار د پارا المپيک کميټې د غونډو په تالار کې پيل شو.
په دغه سمينار کې به د هنډبال ملي فدراسيون د مشر روزونکي احمد شاه عطايي او د دې فدراسيون د ځوانانو لوبډلې ټرينر استاد منير له لوري ګډونکونو لوبغاړو ته د ويلچر هنډبال لوبې د بېلابېلو قوانينو، اصولو او د لوبې د سيستم په اړه هر اړخيز معلومات تشريح شي.
د ويلو ده، چې ياد سمينار لوبغاړو ته د ويلچر هنډبال په اړه د لازيات پوهاوي په موخه، د هنډبال ملي فدراسيون رئیس هدايت الله کامه وال، د دې فدراسيون مسوولينو او ورزشکارانو په شتون کې پيل شو، چې درې ورځې به دوام وکړي.
