کابل کې د ۱۴ لوبډلو ترمنځ د بسکټبال ملي لوبډلې پنځه څلوېښتم پړاو ټاکنیزې سیالۍ پای ته ورسېدې
د المپيک کمېټې، بدني روزنې او ورزش عمومي ریاست اړوند د بسکټبال ملي فدراسیون له لوري د یاد ریاست په ۵۰۰ کسیز جمنازیوم کې له دیارلسو ولایتونو د ۱۴ لوبډلو ترمنځ د بسکټبال ملي لوبډلې پنځه څلوېښتم پړاو ټاکنیزې سیالۍ پای ته ورسېدې.
د دغو سیالیو پایلوبه د هرات ولایت ورزشکارانو او د کابل ولایت ورزشکارانو ترمنځ ترسره شوه، چې په پایله کې د هرات ولایت ورزشکارانو د زیاتو امتیازونو په ترلاسه کولو سره لومړی مقام او اتلولي یې خپله کړه، د کابل ولایت ورزشکارانو دویم او د کندهار ولایت ورزشکارانو درېیم مقام ترلاسه کړ.
د یادونې وړ ده، چې په دغو لوبغاړو کې ۱۸ تنه ورزشکاران د هېواد د بسکټبال ملي لوبډلې ته، ۱۴ تنه ورزشکاران د ځوانانو بسکټبال ملي لوبډلې ته او ۱۲ تنه ورزشکاران د نویو ځوانانو بسکټبال ملي لوبډلې ته وټاکل شول.
هېره دې نه وي د دغو سیالیو د پای مراسمو ته د المپیک کمېټې، بدني روزنې او ورزش عمومي ریاست فني او مسلکي مرستیال حافظ احمد جان ځدراڼ، د ورزش ادارې فني او مسلکي سرپرست حمید الله صافی، ورزشي مشاور ګلاب الدین خپلواک، د ورزش ادارې د امریتونو مسوولین، د بسکټبال ملي فدراسیون رهبري پلاوي، ورزشکاران او زیات شمېر مینوال راغلي وو.
د یادو سیالیو موخه د هېواد د بسکټبال ملي لوبډلې ته د غوره لوبغاړو موندل و، چې شپږ ورځې یې دوام وکړ.
د سیالیو په پای کې د بسکټبال ملي فدراسیون له لوري غوره لوبډلې او لوبغاړو ته چمتو شوې ډالۍ ورکړل شوې.
