کابل کې د ۲۲۰ ورزش کارانو ترمنځ د سوک وهنې ټاکنیزې سیالۍ پیل شوې
د المپیک ملي کمېټې، بدني روزنې او ورزش لوی ریاست اړوند د سوک وهنې ملي فدراسیون له لوري د یاد فدراسیون په ورزشي جمنازیوم کې د کابل ښار څلورو زونونو او درېیو ولسواليو د ۲۲۰ ورزش کارانو ترمنځ د سوک وهنې ټاکنیزې سیالۍ پیل شوې.
په دغو سیالیو کې د کابل ښار پر زونونو سربېره د بګراميو، کوهدامن او پغمان ولسوالیو ۲۲۰ ورزش کارانو ګډون کړی دی، چې له ۴۸ تر ۹۲+ کیلو ګرامه (۱۳) وزني کټګوریو کې به د یو بل پر وړاندې ولوبیږي او په پای کې به ۲۶ تنه غوره ورزشکاران د کابل د سوک وهنې ټاکنیزې لوبډلې ته وټاکل شي.
یادې سیالۍ د کابل ولایت د سوک وهنې ټاکنیزې لوبډلې ته د غوره ورزش کارانو د ټاکلو په موخه پیل شوي دي، چې شپږ ورځې به دوام وکړي.
