کابل کې ۲۰ لوبڅارانو او روزونکو ته د موی تای په برخه کې د ظرفیت لوړولو ښوونيز سيمينار پای ته ورسېده
د المپيک، بدني روزنې او ورزش عمومي رياست اړوند د موی تای ملي فدراسیون له لوري د المپيک ملي کمېټې د غونډو پت تالار کې له مرکز او ولايتونو څخه ۲۰ لوبڅارانو او روزونکو ته د موی تای په برخه کې د روزونکو او لوبڅارانو د ظرفیت لوړولو ښوونيز سيمينار پای ته ورسېده.
یاد روزنيز ښوونيز سيمينار د موی تای ملي لوبډلې سر روزونکي استاد خليل رسولي، استاد عبدالحمید قاسمي او په افغانستان کې نړیوال لوبڅار وحيدالله علیزاده له لوري په نظري او عملي ډول تدريس شو، چې په کې د روزنې په نويو قوانينو، د روزنې په نويو تخنيک او تکتيک او د تمريناتو په منظمو اصولو او په بېلا بېلو موضوعاتو خبرې وشوې.
د يادونې وړ ده، چې په دغه سيمينار کې د مرکز کابل، بلخ، هرات، غزني، لغمان، هلمند او کندهار ولايتونو روزونکو او لوبڅارانو ګډون کړی وو، چې څلور ورځې يې دوام وکړ.
د سيمينار په کې ګډون کوونکو لوبڅارانو او روزونکو ته د لوبڅارۍ او روزنې سندونه ورکړل شول.
