کندز؛ د علي اباد لوبډلې د والیبال سیالۍ د سید احمد لوبډلې په اتلولۍ پای ته ورسېدې
د کندز ولایت د بدني روزنې او ورزش ریاست او والیبال فدراسیون په همغږۍ د علي اباد ولسوالۍ په عمر خېلو کلي کې د ۱۲ لوبډلو ترمنځ د والیبال سیالۍ د سید احمد لوبډلې په بریا پای ته ورسېدې.
دغو سیالیو یوه اوونۍ دوام وکړ او پایلوبه ته یې سید احمد او عمرخېلو لوبډلې لار موندلې وه، چې په پایله کې سیداحمد لوبډلې وکولای شوای خپلې سیالې لوبډلې ته د ۳-۰ میدانونو په توپیر ماتې ورکړي او اتلولي خپله کړي.
هېره دې نه وي چې د دغو سیالیو موخه لرې پرتو سیمو ته د ورزش رسول او همدارنګه ورزش ته د ځوانانو هڅول وو.
