کندز؛ په ګل تېپې ولسوالۍ کې د ٣٢ لوبډلو ترمنځ د ټېپ بال کرېکټ سيالۍ پای ته ورسیدې
د کندوز ولايت د بدني روزنې او ورزش رياست اړوند د ټېپ بال کرېکټ فدراسيون د استازولۍ له لوري د ياد ولايت په ګل تېپې ولسوالۍ کې د مرکز او ولسوالیو د ۳۲ لوبډلو ترمنځ قوش تېپې جام په نوم د ټېپ بال کرېکټ سيالۍ، چې ۱۲ ورځې مخکې پيل شوې وې د شينوارو اتلانو لوبډلې په اتلولۍ پای ته ورسېدې.
د دغو سياليو پايلوبه د چهار درې اتلانو او شينواري اتلانو لوبډلو ترمنځ ترسره شوه، شينواري اتلانو لوبډلې د پچې په ګټلو سره د توپ وهنې پریکړه وکړه، چې په ټاکلو اتو اورونو کې د پنځو لوبغاړو په سوځېدو سره مقابلې لوبډلې ته د ۱۸۷ منډو هدف وټاکه. په ځواب کې د چهار درې اتلانو لوبډلې په ټولو اورونو کې د شپږو لوبغاړو په سوځېدو سره ۱۲۶ منډې جوړې کړې او د ۵۱ منډو په توپیر يې لوبه وبایلله.
د يادو سياليو موخه ورزش ته د ځوانانو هڅول و.
